Cymru - Y Genedl sy'n Croesawu Cwpan Ryder 2010
Ryder Cup 2010
Llysgennad Swyddogol
Woosnam yn chwifio'r faner dros Gymru
Ian Woosnam yw llysgennad swyddogol Tîm Cymru ar gyfer Cwpan Ryder 2010.
Gwnaeth Cwpan Ryder Cymru wahodd Capten Ewrop, a oedd yn fuddugol yng ngornest Cwpan Ryder 2006 yn Iwerddon, i gymryd rôl arweiniol.
"Roedd ennill y cais i gynnal Cwpan Ryder 2010 yn rhoi'r cyfle i Gymru ddweud wrth y byd beth sydd ganddi i'w gynnig.
"Yn y dyddiau cynnar, roedd rhai pobl yn arfer gofyn i mi ymhle yn Lloegr yr oedd Cymru? Diolch byth, mae'r cwestiynau hynny yn y gorffennol ac fel llysgennad swyddogol, mae'n wych bod yn rhan o'r ymgyrch i hyrwyddo Cymru fel lleoliad golffio a thwristiaeth.
"Dw i ddim yn synnu bod brwdfrydedd cais Cymru wedi ennill. O gynnwrf y cyhoeddiad cyntaf hwnnw, datblygir y syniadau a'r cyfleoedd o fis i fis, a'n swyddogaeth ni fel rhan o Dîm Cymru yw helpu i weithredu'r rhain."
IAN WOOSNAM
"Nid gornest golff tri diwrnod yng Nghasnewydd yn unig mo'r Cwpan Ryder yng Nghymru, ond cyfle i ddangos cymwysterau busnes, diwylliant a thwristiaeth y genedl i'r byd. Mae Ian yn llysgennad arbennig dros y wlad, ac fel rhan o Dîm Cymru, bydd yn chwarae rôl bwysig yn hyrwyddo proffil Cymru ar lwyfan byd-eang ac yn atgyfnerthu ein safle fel lleoliad twristiaeth, golffio a busnes rhyngwladol." Andrew Davies, Gweinidog Cymru dros Fenter, Arloesi a Rhwydweithiau.
Er mai Barbados yw ei brif breswylfa bellach, mae Ian yn aml yn ymweld â'i gartref ac mae'n hoffi chwarae ar ei gwrs cartref yn Llanymynech. Mae ganddo garafán y tu ôl i'r ti cyntaf yn Aberdyfi, ac mae'n ei gyfrif yn un o'i hoff gyrsiau o hyd.
Oeddech chi'n gwybod…?
Mae wedi chwarae mewn wyth Cwpan Ryder ac ef yw'r trydydd Cymro i fod yn gapten ar dim Ewrop, gan ddilyn yn ôl troed Dai Rees a Brian Huggett.
Hyd heddiw, mae yn un o ddim ond dau chwaraewr Cwpan Ryder Ewropeaidd i ennill yr uchafswm o bedwar pwynt o'r gornestau dau bedwarawd a dwy gêm bedair pêl.
Enillodd Dwrnamaint y Meistri yn yr Augusta National ym 1991.
Fe oedd y chwaraewr cyntaf i gipio Pencampwriaeth Match Play y Byd mewn tri degawd - ac yn 2001, yn 43 oed, yr enillydd hynaf - gan guro Padraig Harrington mewn gornest derfynol epig.
Mae e wedi cynrychioli Cymru 17 gwaith yng Nghwpan Golff y Byd.
Mae wedi llwyddo i ennill 44 twrnamaint proffesiynol yn ystod ei yrfa, sydd yn fwy nag unrhyw golffiwr Prydeinig cyfoes.
Ef oedd y chwaraewr cyntaf i ennill £1miliwn mewn un tymor.
Yn fachgen, gweithiai ar fferm ei Dad, ac ar ôl i'r gwaith gael ei wneud, byddai wedyn yn cael chwarae golff. Creda bod y cryfder sydd ganddo o ganlyniad i'r holl flynyddoedd o waith fferm, yn enwedig codi byrnau gwair trwm a gyrru'r tractor yn blentyn.
Fel golffiwr uchelgeisiol, roedd hi'n galed cael dau ben llinyn ynghyd, ac fe deithiodd ef a'i ffrindiau mewn cerbyd gwersylla a chwarae yn y Daith Ewropeaidd. Dim bwydlenni egsotig yn y dyddiau hynny, ond diet sefydlog o ffa pob a chreision.
Fel un o'r rhai oedd yn taro'r bêl bellaf ar y Daith, edmygwyd ei swing syml, rythmig ac anghymhleth drwy'r byd. Roedd ei swing yn ymddangos yn ddiymdrech, tebyg i sbring dorchog yn dad-ddirwyn. Hyd y dydd heddiw, mae'n un o'r ergydwyr gorau â ffon haearn.